Antoinette sê
Van Boussac reis ons na Aurillac vir twee dae waar ons by gaskok Marcia Gerber kook. Marcia en haar man Stefan is in Frankryk oor rugby! Heelwat Suid Afrikaners speel klub-rugby in Frankryk en die span van Aurillac het nie minder as sewe Suid Afrikaners nie.
Marcia, Stefan en twee-jaar oue Wian bly so ‘n paar kilometers uit die dorp in ‘n pragtige moderne kliphuis op ‘n kleinhoewe. Hulle het 4 skape en ‘n oulike Jack Russel hondtjie. Buurman Rassie van Nelspruit, speel ook rugby en is byderhand om te help tafeldek vir die lekker middagete.
(Op die foto staan ek tussen Stefan en Rassie – kon nie die kans laat verby gaan nie!)
Ons kook twee tipies Franse geregte, koolfrikadelle – wat ons ook in Suid Afrika ken - in ‘n heerlike tamatiesous, ‘n hoofgereg van forel met chantalkaas uit die streek en oondgeroosterde groente. Heerlik.
Die forel kom van ‘n forelplaas net buite Aurillac in die berge. Dit is yskoud toe ons daar aankom met so’n sagte motreentjie, maar die forel-man is reg vir ons. Marcia en Marita help vang en kort voor lank het ons ‘n paar lekker forelle in ‘n netjiese wit houer. Varser as dit kry jy nie sommer nie!
Na die kook-sessie word ons saamgenooi na’n wedstryd tussen Aurillac se o/19's en 'n buurdorp en oral hoor jy Afrikaans!! Aurillac se span wen die wedstryd!!
Baie dankie Marcia, Stefan, Rassie en al die Suid-Afrikaners in Aurillac wat ons so welkom laat voel het.
 |
| Pragtige Aurillac |
 |
| Marita vertaal die forel-man. |
 |
| Dis lekker koud in Aurillac. |
 |
| Marcia en haar twee manne, Stefan en Wian |
 |
| Marita en Marcia in die kombuis. |
 |
| Marcia se heerlike forel en kaasgereg |
 |
| Marcia en buurman, Rassie. |
 |
| Ons neem Aurillac se O-19's af. |
 |
| Ons manne saam met Marcia se manne! |
No comments:
Post a Comment